Guovdageainnu bivdiid ja guolásteddjiid searvi (KJFF) ávžžuha suohkana lasihit vihtta goalssi juohke loddejeaddji bivdolohpái.
KJFF lea sádden ohcama báhčit suvragolssiid ja gusagolssiid, vai dát loddenálit unnoše Čábardašjogas. Sii áiggoše maid oažžut Stuorajávrri čázádaga mielde guovlluide gos lea lohpi loddet Guovdageainnus.
– Dat bargu maid KJFF lea bargan Čábardašjogas lea dagahan ahte johka lea šaddan okta buoremus dápmotjohkan olles Norggas, čállet sii ohcamis.
Sii čujuhit maid ahte namuhuvvon goalssit jáhkkimis monnejit dán čázádahkii ja go dát dagahit nu stuora vahágiid čázádaga guliide, de galggašii lobálaš báhčit dáid náliid giđđaloddema oktavuođas.
John Anders Tornensis ja Johan Klemet I. Hætta leaba vuolláičállán ohcama ja soai evttoheaba ge ahte juohke loddejeaddji galggašii oažžut lassieari mas leat vihtta goalssi dán jagáš bivddus.
