Ulbmil dárkkistemiiguin lea čorget várálaš fievrruid eret luottaid alde.
Luoddadoaimmahaga lossa fievrruid deahkaid ja gehtegiid dárkkisteapmi lea dagahan 336 sáhku, 385 geavahangildosa ja guhtta váidaga mannan dálvvi.
Stáda geaidnodoaimmahat leat dárkkistan 11 286 lossa fievrru. Dat lea 3 638 eambbo go diibmá.
– Ulbmil dárkkistemiiguin lea čorget várálaš fievrruid eret luottaid alde. Lassin eambbo dárkkistemiide leat mii maid dárkkistan riikkarájáid eambbo, dadjá Geaidnodoaimmahaga sekšuvdnajođiheaddji, Helle Torill Sandvik preassadieđáhusas.
385 gildosa
385 fievrru leat gildon vuodjimis dálvet, ja 336 sáhku leat addon. Guđa dilálašvuođas ledje váilevašvuođat nu vearrát ahte šadde váidit.
– Birrasii 6 proseantta dain dárkkistuvvon fievrruin leat ožžon reakšuvnnaid. Dat mearkkaša ahte eanas fievrruin leat dat deahkat ja gehtegat mat galget, muhto dađi bahábut leat ain muhtumat geain ii leat buot ortnegis, dadjá Sandvik.
Ráđđeaddin muđui riikkas
Ođđajagis lei heajos siivu mii dagahii stuora hástalusaid. Dat dagahii ahte Stáda geaidnodoaimmahat sáddii dárkkisteddjiid lullelis riikkas davás.
– Mii leat riikkaoassi gos lea gáibideaddji dálvesiivu. Lassin ráđđeaddimii eará sajiin riikkas, leat mii maid juohkán iežamet resurssaid. Boađus lea 48 proseantta eambbo dárkkisteamit dál go diibmá, dadjá Sandvik.
Vaikko kaleanddar čájeha ahte dálvi dál lea nohkan, de Stáda geaidnodoaimmahat áigu ain dárkkistit deahkaid ja gehtegiid jus dálki ja siivu gáibida dan.
– Gáibádus ahte dus galget deahkat heivehuvvot siivui lea birra jagi. Jus leat vuolgime dohko gos sáhttá muohta ja jiekŋa, de fertet ieš dárkkistit ahte leat deahkat ja gehtegat vai lea buorre coakci, dadjá Sandvik.
