Almmuhus

Almmuhus

Skuvla­mánát gahčče suddái meahcce­mátkkis

Ábeskovus Ruoŧas lea disdaga čađahuvvon gádjunakšuvdna go meahcásteaddjit gahčče suddái Ábeskovujohkii.

Ábeskovus bođii SOS-heahtediehtu maŋŋel go máŋggas gahčče Ábeskovujoga suddái Kungsleden bálgá lahkosis. Lei skuvlaklássa meahccemátkis go bártašuvve.

Almmuhuvvuon: 
Maŋŋebárga, 23 Cuoŋománu, 2019 - 16:41
Ođastuvvon: 
Ođastuvvon: 25.04.2019 - 11:05
Fáddásánit: 

Heahteveahkit leat báikkis gádjume olbmuid eret suttis, ja fertejit vinššain oažžut sin bajás.

Gádjunveahkit, politiijahelikopter ja Norgga helikopterat leat gádjume meahcásteddjiid, čállet Ruoŧa politiijat disdaga diibmu 14.40.

Diehtu politiijaide álggos lei ahte čiežas galget leat beassan eret jogas dearvan, muhto eai leat nu buori vuoimmis ja dárbbašit sáhtu Ábeskovvui.

Dieđihit maid ahte okta olmmoš sáddejuvvui ambulánsahelikopteriin eret báikkis.

Maŋŋelaš lea njulgejuvvon diehtu ahte leigga guovttis gahččan suddái.

– Ii leat diehtu makkár vuoimmis son lea, dieđihit Ruoŧa politiijat sin neahttasiiddus.

Politiijat eai leat dieđihan makkár fievrruin meahccemannit ledje jođus.

 

Diibmu 16.30 dieđihit politiijat ahte guovttis leigga gahččan suddái. Soai leaba ambulánsahelikopteriin dolvojuvvon eret báikkis.

Dat guhtta eará meahcásteaddji eai lean gahččan joga suddái, muhto gádjunhelikopter lea viežžan sin ja dolvon sin Ábeskovvui.

 

 

Diibmu 19.30 dieđihuvvo ahte ledje muhtin Girona skuvlla oahppit ja oahpaheaddjit geat gáhčče suddái. Suohkana kriisajoavku lea doaimmas.

Sii ledje joga jieŋa alde go jiekŋa ja čáhcebárru fáhkka bođii.

Politiijat dárkkistit ášši leat bargolihkohisvuohtan, go dáhpáhus lei skuvlaáiggis.

Ovdasiiddus dál