Finnmárkku politiijaguovllu politiijameašttir, Ellen Katrine Hætta, guorahallo Politiijaid Spesialovttadagas.
Sivvan galgá leat jáhkkimis gávpi skohteriin Nuorta-Finnmárkkus gaskal politiijaguovllu ja su isida.
iFinnmarkii Hætta duođašta ahte son lea dutkamis, ja ahte dat lei hui hirpmahuhtti.
Son biehttala leamaš gávppi gaskal politiijaguovllu ja fitnodaga gos su isit lea bargan.
– Vuosttažettiin heittii son vuovdimis skohteriid 2011:s, son ii ge leat goasse bargan fitnodagas gos mii leat gávppašan skohteriid juovlamánus 2013:s, čilge Hætta.
Duođašta
Spesialovttadaga Halvor Hjelm-Hansen dadjá iFinnmarkii ahte son duođašta ahte leat boahtán dieđut mat leat registrerejuvvon váiddan, mii guoská Finnmárkku politiijaguvlui ja fievrogávppašeapmái.
– Mii dutkat dan, muhto eat sáhte addit eambbo dieđuid juste dál, dadjá son.
Čállán facebookas
Hætta čálii ies dan birra Facebookii duorastaga maŋŋelgaskabeaivvi.
Son čállá ahte lea behtolaš váidda, muhto ii áiggo duođi eambbo árvádallat gii dan lea bargan.
– Konkrehta čuoččuhuvvo ahte mus leat leamaš ekonomalaš ovdamunit iežan priváhta biilla gávppiin, ja ahte politiijaguovlu lea oastán skohteriid mu isidis, čállá son.
Son biehttala dan ja čállá ahte su priváhta biila lea oston priváhta olbmos ovdal go šattai politiijameašttirin, ja ahte skohterat maid birra lea sáhka ostojedje maŋŋel ovtta háhkanproseassa mii geavai máŋga jagi maŋŋel go su isit heittii skohteriid vuovdimis.
Ávvir ii leat fáhten Ellen Katrine Hætta ságaide dán áššis.
