Almmuhus

Almmuhus

Sáhttá šaddat dievas moivi

SAS girdijohtolagas sáhttá šaddat dievas moivi jus 1500 pilohta váldojuvvojit bargoheaitagii bearjadaga. Čájáhusgovva: Jon Olav Nesvold/NTB Scanpix

Jus SAS-pilohtat mannet bargoheaitagii, de sáhttá šaddat dievas moivi fitnodaga girdijohtolagas bearjadaga rájes. 

Almmuhuvvuon: 
Vuossárga, 22 Cuoŋománu, 2019 - 09:56
Fáddásánit: 

Norgga, Ruoŧa ja Dánmárkku SAS-pilohtat gáibidit buoret bargoeavttuid. 

Jus eai nagot soahpat bargoaddiin, de sáhttet 1500 pilohta váldojuvvojit bargoheaitagii bearjadat iđida.

550 dáin barget Norggas. 

– Mii sávvat ahte ášši čovdojuvvo. Lea ain beare árrat einnostit man láhkai bargoheaitta váikkuhivčče girdijohtolahkii, dadjá SAS diehtojuohkinhoavda Knut Morten Johansen NTB ođasdoaimmahahkii. 
 

Bargoáiggit 

Soabatmeahttunvuohta lea čuožžilan bargoáiggiid ja vahkkoloahpavuoruid geažil. 

SAS-pilohtat eai dieđe ovdagihtii man olu ja man dávjá galget bargat čuovvovaš mánu. 

Sis lea riekti oažžu friddja ovtta vahkkoloahpa mánus, muhto gártet muhtomin bargat čieža vahkkoloahpa maŋŋálagaid ovdal go bargoplána mielde lea vahkkoloahpafriddja. 

 

Heaittihan šiehtadusaid 

SAS lea maiddái heaittihan guokte šiehtadusa iežaset pilohtaiguin mat ledje buorrin earret eará karriearaovdáneapmái ja bargojuhkosiidda.

– Mii sávvat earret eará ahte SAS jorgala bargošiehtadusaid ektui ovdal go soabadallanáigemearri dievvá, dadjá Norgga pilohtaidsearvvi Parat jođiheaddji Jan Levi Skogvang. 

Bealit leat guhkit áigge viggan šiehtadallat, muhto botkejedje šiehtadallamiid cuoŋománu 1. beaivvi. Gaskavahkku deaivvadit riikasoabadalli luhtte. 

Ovdasiiddus dál