15-jahkásaš bárdni lei skuvlamátkkis čuoigame Ábeskovus go soavlebárru golggiidii ja bahut roasmmohuhtii su.
Dáhpáhus lei Ábeskovus mannan vahkku, distaga, go skuvlaklássa Gironis eret, ledje rasttildeame jieŋa muhtin joga badjel go soavlebárru fáhkka bođii.
Guokte oahppi fertejedje sáddet buohccivissui Romsii ja Jiellevárrái.
Ledje skuvlamátkis
15-jahkásaš bárdni, gii sáddejuvvui Romssa buohccivissui, jámii duorastaga, duođaštit Romssa buohcciviesus, čállá Sameradion & SVT Sápmi neahttasiiddustis.
Skuvla lei iežaset neahttasiidui čállán dieđuid ahte dollet rabasin eahkedis, ja ahte suohkana heahtejoavku lea maid mielde veahkkin sidjiide vai olbmot besset earret eará hupmat dáhpáhusa birra.
Ledje 12 oahppi geat ledje skuvlamátkkis ja golbma oahpaheaddji. Sii galge čuoigalit Nissonjoga, go soavlebárru vuorddekeahttá iđistii ja rohttii mielde guokte oahppi.
Nubbi oahppi, gii sáddejuvvui Jiellevári buohccivissui, lea dearvan ja lea fas Gironis.
