Lávvardaga njukčamánu 16. beaivvi lea Kvena álbmotbeaivvi. Finnmárkku fylkkagielda ávvuda beaivvi kveanaleavgageassimiin olggobealde fylkkaviesu.
Finnmárkku fylkkagielda lea sádden preassadieđáhusa Kvena álbmotbeaivvi oktavuođas:
– Kvenat/norggasuopmelaččat leat stuora oassi Davvi-Norgga álbmogis, ja leat ollu mearkkašan olles regiovdnii guhkit áiggi. Finnmárkku fylkkagielda ávvuda Kvena álbmotbeaivvi, njukčamánu 16. beaivvi, kvenaleavgageassimiin olggobealde fylkkaviesu, ja dieinna lágiin háliida čalmmustahttit ahte kvenat/norggasuopmelaččat leat ollu mearkkašan min fylkii, sihke ovdal ja dál, dadjá fylkkasátnejođiheaddji Ragnhild Vassvik preassadieđáhusas.
Finnmárkku fylkkadiggi mearridii 2018:s strategiijaid nannet kvenaid/norggasuopmelaččaid dili Finnmárkkus, ja 2019:s ásahuvvui ohcanvuđot bušeahttapoasta kvenaid/norggasuopmelaččaid doaimmaid várás.
– Mun sávan eanet vel nannet kvenaid/norggasuopmelaččaid kultuvrra ja servodaga go ođđa Romssa ja Finnmárkku fylkkagielda ovttastahttojuvvo, lasihastá vel Vassvik.
Lihkku beivviin! Onnee Kväänikansan päiväle!
