Politiijabálvalusas leat lassánan nissonat geat leat jođiheaddjit, dál leat 34 proseanta politiijajođiheddjiin nissonolbmot, čájehit Politidirektoráhta logut čállá NTB.
Leat 12 politiijaguovllu ja ovcci guovllus leat badjel 30 proseanta nissonat geat leat jođiheaddjit.
Eanemus lassáneapmi maŋemuš jagis lea leamaš Finnmárkkus ja Agderis. Finnmárkkus lassánii 2017 rájes 2018 rádjái 11 proseanttas 32 prosentii.
– Mii leat áŋgirit bargan oažžut nissoniid jođiheaddjin, muhto mii oaidnit ahte mii fertet ain eambbo bargat. Earenoamážit go lea sáhka politiijafágalaš jođiheaddjivirggiin. Muhto mii ovdánit, lohká Karin Aslaksen politidirektoráhtas.
