-Almmuhus-
OĐĐASATMiellahttoolahus

Miellahttoolahus

-

-

Sosialisttalaš Gurutbellodagas eai leat leamaš goassege nu olu miellahtut go dál, ja masá 70 proseantta ođđa miellahtuin leat nissonolbmot. 

Ođđajagi rájes leat 2771 ođđa olbmo dieđihan iežaset miellahttun Sosialisttalaš Gurutbellodahkii, čállá Klassekamspen.

Bellodagas leat oktiibuot 14 627 miellahttu. 

– Dát lea hirbmat movttiidahtti ja čájeha ahte bellodat ovdána. Eat mii birgehala dušše bures oaiviliskkademiin, dadjá Sosialisttalaš Gurutbellodaga jođiheaddji Audun Lysbakken. 

 

Abortariidu

Bellodatjođiheaddji jáhkká abortariiddu geasuhan ođđa miellahtuid maŋŋel go ráđđehus rabai vejolašvuođa čavget nissonolbmuid iešmearrideami jumešaborta ektui.

Dattetge ii jáhke Lysbakken dušše dan digaštallama váikkuhan miellahttolasáhussii. 

– Jus geahčada miellahttologuid 2013 rájes, de lea lohku lassánan nannosit jagis jahkái. Muhto dieđusge vásiheimmet ahte miellahtut lassánedje jođánabbot go dábálaččat maŋŋel go Erna Solberg hárddii olbmuid abortalága gáržžidemiin, dadjá son.

Sosialisttalaš Gurutbellodat lágida jahkečoahkkima Gardermoenis bearjadaga.

-Almmuhus-