Son náitalii iežas Guroin beaivvi ovdal beanagilvvuid. Dál lea Thomas Wærner vuoitán sihke Femundgilvvuid ja Finnmarksløpet 1200 km seamma jagi.
Thomas Wærner (46) vuittii dán jagáš Finnmarksløpet beanavuodjimiid guhkimus gilvvu, FL-1200.
Diibmu 14.38 bearjadaga ollii son Áltái stuora mojiin ja illun daidda oallut gehččiide geat ledje boahtán gávpogii.
– Juo, jáhkán attii liigenávccaid náitalit čáppa jiekŋahoteallas. Lei erenoamáš go oanehis áiggis lágidedje vihaheami doppe. Lei vásáhus mii dagai hui buori, dajai Wærner maŋŋel go ollii mollii ovcciin beatnagiin.
Golbma beatnaga lei šaddan guođđit.
Unnán váttisvuođat
Son lohká dárkilit plánen movt vuodjit beaktilit ja vuoitit.
Moallabáikkis lei ge Guro vuordime ja vuoiti oaččui dieđusge albma vuoitocummá ođđa eamidis.
– Thomas lea leamaš sihkar ahte manná bures, ja lea doalahan buori movtta. Eai leat leamaš váttisvuođat ge namuhanveara, ja go ieš lea buori mielas, dat váikkuha beatnagiidda, dajai son mojunjálmmiid.
Guhkimus gilvvuid gonagas
24 jahkái ii leat oktage nagodan vuoitit sihke Femundløpet ja Finnmarksløpet guhkimus gilvvuid seamma jagi.
– Dat gal lea somá, go lea leamaš sáhka beanavuddjiid gaskka ahte ii sáhte vuoitit goappašagaid, muhto dál čajehin ahte dan sáhttá. Lea buorre dovdu, dadjá vuoiti ja áigu dahkat dan vel nuppes.
Son ii vuhtton veháge váiban go ollii mollii.
– Dál áiggun nohkastit, muhto álggos návddašit ovtta vuollaga, dajai son.
Njunnošis ruovttoguvlui
Wærner, gii vuittii Finnmarksløpet maid 2013:s, lea measta čađat leamaš njunnošis.
Vuosttaš bisánanbáikái Guovdageidnui ollii čihččedin, ja dađistaga lei son njunnošis.
Báhčaveadjái lei son ovddemus ja nu vel dan guđa maŋemus bisánanbáikái.
Maŋemus bisánanbáikkis, Joatkkas, ii bisánan eambbo bákkolaš vuolláičállima dihte, ja dollii olles leahtuin viidáseappot Áltái.
– Jallon ruohttat
Lea olu mii galgá lihkostuvvat guhkes beanavuodjimiin, ja Wærner dadjá sus ledje measta jallon beatnagat ruohttat.
– Dat ruhtte nu hirbmat garrasit, muhto dássedit. Lei nu máilmmi hávski beassat vuodjit dakkár beanaráidduin go mus lei. Beatnagat leat duođai buori barggu bargan, ja daidda gullá rápmi. Go bođiimet jalges, garra luddii, de easkka bidje leahtu, dadjá Wærner.
Ruhtavuoitu ja ATV
Váldovuoitu lea 70 000 ruvnno, ja dasa lassin Polaris Sportsman 570 Touring SP njealjejuvllat, mas lea árvu 112 000 ruvnno.
Son oažžu vel Appetitt beatnatbiepmuid 4000 ruvdnui, hoteallaidjadeami ja fiinna mállásiid Scandicas.
2015:s nammaduvvui son Iditarodas «dán jagáš rookie», mii lea buoremus vuosttaš geardde-vuoddji, iežas 17.sajiin.
Sus lea Berserk-nammasaš kennel Synnfjell guovllus Davvi-Torpas Opplánddas ja lea okta sis geat leat álggahan jahkásaš Mush Synnfjell-gilvvuid.
Diibmá fertii son vuollánit gaskan FL-gilvvuid.
Ovddeš eamit bisánii
Go Wærner ii ollášuhttán diimmá FL1200, de ii leat mielde gilvaleame vuoitit 600 000 ruvnno árvosaš Saltdalsbartta, man juhket juohke nuppi jagi.
Bartta vuoitá son guhte lea buoremus sajiide boahtán oktiibuot guovtti maŋemus jagi FL1200-gilvvuin.
Birgitte Næss (43), gii boahtá seammá báikkis go vuoiti Thomas Wærner, ja lea su ovddeš eamit ja mánáid eadni, orui álggos vuoitime goalmmát saji, muhto geassádii gilvvus Joatkkas, ja massii dan vejolašvuođa.
Áltálaš Kristian Walseth nubbin
Nubbin mollii bođii áltálaš Kristian Walseth Gávvaávžžis, čiežain beatnagiin, badjelaš diibmu viđas. Son lei dalle measta beannot diimmu maŋŋel vuoiti.
Dál beassá son hukset áibbas ođđa Saltdalsbartta.
