Sámediggepresideanta Aili Keskitalo lea ilus go KEiiNO-joavku galgá ovddastit Norgga Eurovision Song Contest lávlungilvvus. – Dákko bokte fuomášuhttet sii sámegiela ja sámi kultuvrra, dadjá presideanta.
Dán jagi lea riikkaidgaskasaš álgoálbmotgiellajahki (IYIL2019) mas ulbmil lea čalmmustahttit ja ovddidit álgoálbmotgielaid dili. KEiiNO-joavku, mas sámi artista Fred Buljo lea mielde, vuittii mannan lávvordaga Norgga Melodi Grand Prix-finála.
Sin šuokŋa «Spirits in the sky» seaguha eaŋgalasgiela sámegielain ja luđiin, ja dál beassá olles Eurohpá vásihit sihke sámegiela ja sámi kultuvrra go KEiiNO-joavku lávke lávddi nala Tel Avivas miessemánus.
– Heive hui bures ahte Eurohpá beassá gullat sámegiela Eurovision Song Contest lávlungilvvus juste dán jagi go lea álgoálbmotgiellajahki. Sii loktejit álgoálbmotgiela stuorra lávdái ja leat nu buorit giellaambassadevrrat, dadjá Keskitalo preassadieđáhusas.
Politihkas luohtái
Fred Buljos, gean buoremusat dovdat Duolva Duottar rap-joavkkus, leat maid eará attáldagat go musihkka. Son lea leamaš Árjja bellodaga sámediggeáirras 2016-2017 áigodaga ja sadjásaš áirras 2013-2016 áigodaga. Mannan lávvardaga čájehii vel juoiganattáldagaid olles Norgii.
– Lea hui somá gullat luođi veahá earálágan dilálašvuođas. Mu mielas son lei hui čeahppi juoigat, dadjá sámediggepresideanta.
Ealas fináladoalut
Sámediggeráđđi Henrik Olsen lei geahččame Melodi Grand Prix lávlungilvvu finála Oslo Spektrumas. Son dadjá ahte finála lei hirbmat somás vásáhus ja ahte šattai earenoamáš ealás go vuoiti nammaduvvui. Sámediggeráđđi lei maid hui rámis go KEiiNO vuittii.
– Lei alla dássi ja ollu buorit lávlagat. Lean movttet go luohti ja sámegiella dál fas gullo Eurovision oktavuođas. Sávan lihku jovkui ja olles Sápmái. Mii illudit čuovvut Fred Buljo ja KEiiNO-joavkku viidáset, dadjá Olsen preassadieđáhusas.
