-Almmuhus-
-Almmuhus-
-Almmuhus-
OĐĐASATJuhket 162,5 miljovnna ruvnno nannen dihte bargiid máhtu

Juhket 162,5 miljovnna ruvnno nannen dihte bargiid máhtu

-

-

Ledje olu ohccit geat livčče háliidan oasi dain miljovnnain.

Kompetanse Norge addá doarjaga oahpaheapmái bargosajiin Kompetansepluss ortnega čađa.

Dán jagáš juolludeapmi lea earenoamážit rehketmáhttui.

Kompetansepluss lea doarjjaortnet vuđolaš lohkama, čállima, rehkenastina, njálmmálaš ja IKT, ja maid dárogiel ja sámegiel máhtu oahpaheapmái.

– Lea čielga čanastat gaskal rehket-, bargooassálastin- ja oahppodássemáhtu. Rehketmáhttu váikkuha maid digitála máhtu ovdáneami. Juste danne lea olu deaddu rehkegis dán jagáš juolludeamis, dadjá Kompetanse Norge direktevra Gina Lund preassadieđáhusas.

 

Dán jagáš juolludeamit

– 527 prošeavtta Kompetansepluss barggus, oktiibuot 149 487 000 ruvnno

– Ovcci prošeavtta Kompetansepluss barggus, sámegiella, oktiibuot 2 609 760 ruvnno

– 36 prošeavtta Kompetansepluss eaktodáhtolaš, oktiibuot 9 228 000 ruvnno

– Guhtta prošeavtta Komptetansepluss eaktodáhtolaš, sámegiella, 1 159 000 ruvnno

 

Lohkoipmárdus ja rehketoahppu leat dehálaččat olu dilálašvuođain sihke bargoeallimis ja árgabeaivvis.

PIAAC lea buot stuorámus internationála iskkadeapmi rávesolbmuid gelbbolašvuođas mii goasse lea čađahuvvon.

Iskkadeapmi čájeha ahte 480 000 rávesolbmos Norggas lea heajos máhttu rehkegis. 

 

Lassáneapmi ohcamiiguin

Oktiibuot bohte 1 376 ohcama dán jagi, diimmá ektui go bohte 1 242. Dát dagaha 10 proseantta lassáneami.

Dain leat 1 220 ohcama kvalifiserejuvvon.

– Olahus ohcamiin, ja kvalitehta dain, čájeha man dehálaš Kompetansepluss doarjjaortnet lea. Dán jagáš juolludemiiguin ožžot badjel 11 500 olbmo miehtá riikka vejolašvuođa loktet iežaset gelbbolašvuođa bargosaji čađa, dadjá Gina Lund.

-Almmuhus-