Sohkabealierohusat unnot dearvvašvuođa- ja bajásšaddanfága surggiin. Dáin fágasurggiin leat dábálaččat leamaš ollu eambbo nieiddat go bártnit, muhto ođđa ohcciidlogut čájehit ahte dat lea rievdagoahtán.
– Lea hirbmat buorre go eambbo bártnit oidnet ávkki dearvvašvuođa- ja bajásšaddanoahpus. Boahtteáiggis dárbbašuvvojit eambbo fágabargit ja go de eambbot válljejit fidnofágalaš oahpu lea illudahtti, dadjá oahppo- ja integrerenministar Jan Tore Sanner preassadieđáhusas.
Ain sohkabeali minsttar
Leat ain čielga erohusat nieiddaid ja bártniid ohcamiin go leat ain ollu eambbo bártnit go nieiddat geat ohcet daid dábálaš bárdnefágaide nu go huksen- ja rusttetteknihkka, elektrofága ja teknihkalaš ja industriála buvttadeapmi. Dáin surggiin leat sohkabeali erohusat leamaš čielgasat guhkit áiggi.
Hábmen ja duodji ja dearvvašvuođa- ja bajásšaddanfágat leat ain dat fágat gos leat eambbo nieiddat go bártnit, muhto dain surggiin leat bártnit lassánan ollu maŋemus logi jagi.
Fidnofága ohccit lassánit
Dábálaččat leat ollu eambbo ohccit ohcan lohkanráhkkanahtti fágaide go fidnofágaide, muhto diibmá unnui gaska, ja fidnofága ohccit lassánedje hui ollu.
– Dat čájeha ahte nuorat leat fuobmágoahtán ahte gánnáha válljet fidnofágaid, go dat rahpet ollu uvssaid gelddolaš bargguide, dadjá Sanner.
