Studeanttaidovttastusat leat ohcan hukset dušše 1450 studeantaásodaga vaikke ráđđehus livččii dán jagi juolludan ruđaid 3400 vistái.
Máŋga duháha studeantta leat juohke čavčča studeantaviesuid vuordinlisttus, ja studeantaorganisašuvnnat leat guhká sávvan ahte ráđđehus juolludivččii ruđaid hukset eanet ásodagaid studeanttaid váste.
– Ráđđehussii leamaš dehálaš vuoruhit hukset eanet studeantaásodagaid, ja danin lea imaš go eai leat ohcan ruđaid eanet huksenprošeavttaide, dadjá dutkan- ja alitoahppoministtar Iselin Nybø.
Guorahallá dárbbu
Ráđđehusas livččii áigumuš juolludit ruđaid hukset 3400 ođđa studeantaásodaga, muhto sii leat ožžon ohcamuša ásahit dušše 1450 studeantaásodaga.
Dasa lassin leat Studeanttaovttastusat ohcan divodit 1760 ásodaga.
– Mii áigut iskat manin eai leat ohcan hukset eanet studeantavisttiid ja guorahallat leat go doarvái ásodagat studeanttaid váste. Studeanttaidovttastusat leat ohcan ruđaid divodemiide, muhto dan gal galget rievtti mielde gokčat viessoláiggu ruđaiguin. Mun sávan ahte Norgii huksejuvvojit 3400 ođđa studeantaásodaga, lohká Nybø.
