Sámediggi addá 205 000 ruvnno doarjjan Árran julevsáme guovdásjii Divttasvuonas lágidit nuoraidkonferánssa mii galgá rahpat gulahallama seksualitehta ja seksuála vearredaguid birra.
Sámi nuoraidkonferánssa čađaheami bokte áigu Árran bidjat fuomášumi earenoamážit nuoraide maŋŋel Divttasvuona-ášši.
Sii háliidit bidjat fokusa oadjebasvuhtii; oadjebasvuohta iežas rájiide, go lea eret Divttasvuonas, iežas identitehta go lea sápmelaš, čeavláivuohta iežas kultuvrras, árvvus, doaivvus ja jáhkus boahtteáigái.
– Arena nuoraide lea dehálaš, ja earenoamáš dehálaš lea háhkat arena gos nuorat sáhttet hábmet sihke sisdoalu ja fievrridit ságastallama. Mun lean hui ilus dán álgaga ektui, mii boahtá Árranis ja Doajmmasiebbre Julevsámes, dadjá sámediggeráđđi Mikkel Eskil Mikkelsen preassadieđáhusas.
Áigeguovdilis fáttát
Konferánssas galget leat áigeguovdilis fáttát, nu go bidjat rájáid, dat buorre mii lea seksualitehtas, ja movt atnit ávvira guđet guoimmisteamet, ja gokko mannet rájit irggástallama ja vealaheami gaskka. Konferánsa lea oassi prošeavttas Jasska/Trygg.
Dehálaš bealli dán konferánssas lea hállu váikkuhit arenaid gos mánáid ja nuoraid identitehta nannejuvvo, aktivitehtaid lágideami bokte gos sámi giella ja kultuvra leat vuođđun, ja váikkuha oadjebasvuođa ja čeavláivuođa iežas sámi identitehtas.
– Sámediggi oaidná ahte dát lea dehálaš fáddá mii ovddiduvvo konferánssas. Divttasvuona-ášši maŋŋel báhce oallugiidda ollu gažaldagat, ja ollu fuones dovddut ja sii ledje suorganan sakka. Lea buorre go Árran háliida bidjat fokusa seksualitehtii ja seksuála vearredaguide fáddán, mas nuorat leat olahusjoavkun, dadjá sámediggeráđđi Mikkel Eskil Mikkelsen, ja sávvá Árranii lihku bargui viidáseappot.
