Odne, njukčamánu 11. beaivvi álggahuvvo fas Norggas báhtterčoaggin, dieđiha Miljøagentene preassadieđáhusas.
Báhtterčoaggimii servet njealját luohká oahppit miehtá Norgga.
Njealját luohká mánát servet skuvllaid bokte báhtterčoaggimii. Sii galget golmma vahkus čoaggit eanemus lági mielde adnonbáhtteriid ja doalvut daid ávnnasmáhcahanbáikái.
Dat luohkká mii nagoda eanemus báhtteriid čoaggit vuoitá 30 000 ruvnno, mii galgá adnot birasovddidandoaimmaide.
Báhtterčoagginkámpánjá lea dagahan mánáid eambbo dihtomielalažžan birrasa ektui.
Váldoulbmil báhtterčoaggimiin lea ge eastadit ahte báhtterat eai bálkestuvvo ruskkalihttái, dahje lundui.
Oktiibuot leat jagi 2013 rájes čoaggán njealját luohká oahppit 450 tonna adnon báhtteriid.
