Politiijat ádjánit guhkit dutkat roavva veahkaválddálašvuođa- ja veagalváldináššiid.
Maŋimuš vihtta jagi leat politiijat geavahan menddo olu áiggi dutkat ja čielggadit roavva veahkaválddálašvuođa- ja veagalváldináššiid.
Gaskamearálaččat dutke Norgga politiijat veagalváldináššiid 217 beaivvi diibmá. Áigemearri livččii 130 beaivvi, čállá Dagbladet.
Roavva veahkaválddálašvuođa áššiide ges geavahedje politiijat gaskamearálaččat 130 beaivvi, vaikke dáid galggašedje dutkat 90 beaivvis.
Fuolastahttá
Riikkaadvokáhta ja Politiijadirektoráhta čállet oktasaš raporttas ahte guhkes dutkanáigi vuorjašuhttá ja ahte dáid áššiid galggašii vuoruhit jođáneappot dutkat sihke duođaštusaid geažil ja danin go áššiid bealálaččaide lea dehálaš oažžut jođánis čielggadeami.
Jáhkkimis geavahit politiijat guhkit áiggi gieđahallat ja dutkat dáid áššiid go eambbosat leat váidigoahtán veahkaválddálašvuođa ja seksuálalaš illastemiid.
Dasa lassin sáhttá dutkanáigi lassánan danin go Norgga kriminalitehta lea nu máŋggadáfot.
(©NTB)
