Birrasii 300 olbmo leat čoahkkanan Sámedikki giellakonferánsii, ja dát illudahttá sámediggepresideanta.
Sámediggi lágida giellkonferánsa Romssas gosa birrasii 300 olbmo leat čoahkkanan.
– Mun lean hirpmahuvvan go nu oallugat leat searvan. Dat muitala ahte min servodagas lea beroštupmi bargat giellaáššiiguin. Dáppe leat fágabargit geat beaivválaččat barget giellaáššiiguin, muhto maiddái politihkkárat ja eará giellaberošteaddjit oasálastet. Dan lea hui somá oaidnit, dadjá sámediggepresideanta Aili Keskitalo.
Giellajahki
Sámedikki giellakonferánsa čalmmustahttá ON riikkaidgaskasaš álgoálbmotgiellajagi mii álggahuvvui gieskat.
Giellakonferánsa álggaha maiddái Sámedikki giellaáŋgiruššama «Giellaloktema» mii galgá guhkit áigge badjel ulbmillaččat ovddidit sámegielaid.
Sámedikki višuvdna lea ahte sámegielat galget leat lunddolaš, servodatguoddi ja ealli gielat servodagas. Sámegielat galggaše ovttaárvosaččat dárogielain.
