Finnmárkku ambulánsabálvalus ii oaččo dušše váibmokomprešuvdnamašiinnaid, muhto sii geahččalit maid ortnega mas ambulánssat besset jorgalit Skáiddis. Doppe galgá sierra ambulánsa mii doalvu pasieanttaid Hámmárfeastta buohccevissui.
Seammás go Finnmárkku Buohcceviessu oastá buot ambulánsaguovddážiidda váibmokomprešuvdnamašiinnaid, de dieđihit ahte áigot ambulánsabálvalusa vel eanet nannet.
Geahččalanprošeavttas galget oarjefylkka ambulánssat doalvut pasieanttaid Skáiddi rádjái, das galgá sierra ambulánsa mii johtá buhcciiguin viidáset Hámmárfeastta buohccevissui.
– Dát nanne gearggusvuođa. Ovdan ruoktot Kárášjogas Hámmárfestii manná birrasii čieža diimmu. Jus beassat jorgalit Skáiddis, de ádjánit dušše njeallje diimmu. Leavnnjas fas oatnu ambulánsamátki beliin, dadjá Gaska-Finnmárkku ambulánssaid ossodatjođiheaddji Are Nedrejord preassadieđáhusas.
Buoret bálvalus
Finnmárkku Buohcceviesu áigumuš lea sirdit ovtta Hámmárfeastta golmma ambulánssas Skáidái. Dáinna lágiin áigot seastit ruđa ja buoredit gearggusvuođa.
– Go ambulánssat besset johtileappot jorggihit, de bisuhit gearggusvuođa. Dat unnida vára ahte ambulánsaresurssat eai galggaše iežaset gielddas jus duođalaš dáhpáhusat deaividit, dadjá Finnmárkkubuohcceviesu prehospitála bálvalusaid klinihkkahoavda Jørgen Nilsen.
Dál molsot jo birrasii 700 pasieantta ambulánsa Skáiddis. Finnmárkku Buohcceviessu oastá ođđa sáppeliid mat heivejit buot ambulánssaide, dalle eai dárbbaš buohccit sirdojuvvot nuppi biilla sáppelii.
Pasieantasirdin ii dáhpáhuva jus lea «ruksesmátki» dahje jus doavttir oaivvilda ahte pasieanttas galget sámegielat ambulánsabargit.
