Jon Henrik Fjällgren beasai lávvordateahket njuolga Melodifestivalen finálii lávlagiin «Norrsken»
Jon Henrik Fjällgren lei ovdalaččas juo okta favorihtain ja nagodii, nu go ovddit háviid go lea gilvalan Melodifestivalen oassefinálain, beassat njuolga finálii.
Odne eahket lei Ruoŧa Melodifestivalen goalmmát oassefinála.
Melodifestivalen geahččit jienastedje Jon Henrik Fjällgren luohte-lávlaga «Norrsken» njuolga Melodifestivalen finálii.
– Dál leat oalle olu dovddut gorudis, dajai Jon Henrik Fjällgren SVT kanálii maŋŋel go lei almmuhuvvon ahte son beassá njuolga finálii.
– Váldit vára eallimis
Jon Henrik Fjällgren, Fredrik Kempe, David Kreuger ja Niklas Carson Mattson leat ovttas ráhkadan lávlaga «Norrsken».
Fjällgren čilge SVT kanálii ahte «Norssken», máttasámegillii goeksegh, lávlla lea dan birra ahte olmmoš galgá váldit vára eallimis ja čuovvut nieguidis.
Nubbi artista gii manai njuolga finálii lei Lina Hedlund lávlagiin «Victorious»
Goalmmát geardde
Lea goalmmát geardde go Fjällgren gilvala Melodifestivalen gilvvus, ja son lea ge ovdal fasken sihke nuppi ja goalmmát saji dáin gilvvuin.
Vuosttaš geardde searvvai 2015:s lávlagiin «Jag är fri (Manne leam frijje) ja šattai nubbin.
2017:s searvvaiga Jon Henrik Fjällgren ja Aninia lávlagiin ««En varld full av strider (Veareldegusnie jeenh vigkieh)» ja bođiiga goalmmát sadjái.
Melodifestivalen finála lágiduvvo Stockholmmas njukčamánu 9. beaivvi dán jagi.