Tråantes lágiduvvo seminára dan birra movt heaittihit koloniserema. Lea Saemien Studeenth Tråantesne ja SAIH Trondheim mat lágiidit seminára Tråantes guovvamánu 21. beaivvi.
Lágideaddjit čállet preassadieđáhusas ahte áiggiid čađa lea leamaš oahppu ja dutkan dehálaš oassi das mii lea dehálaš ja rievttes máhttu, ja lassin duolbman ja kolonialisma.
Dat guoská sihke Norggas ja riikkaidgaskasaččat.
Viidáset čállet ahte maŋŋel Tråánte2017 bođii bures ovdan ahte Tråante lea oassin Sámis.
Lei álbmotdeaivvadeapmi mii ivdnii olles gávpoga, ja mii rabai vejolašvuođaid čalmmustahttit sámi kultuvrra, historjjá ja perspektiivva.
– Maŋŋel dan, lei maiddái NTNU:s dat vejolašvuohta, muhto oaidnit go mii dan dálá lohkanmearis? Manne leat eará perspektiivvat, maiddái sámi, dehálaččat Norgga stuorámus universitehtas? Movt mii sáhttit oahppat das, čállá Elen Ravna preassadieđáhusas.
Vai dieid gažaldagaid ožžot beaiveortnegii, de sii lágidit ge seminára «Hvordan avkolonisere akademia», sámegillii Saemien Studeenth Tråantesne «Movt heaittihit koloniserema akademiijas».
Seminára prográmmas lea sátnevuorru earret eará Ol-Johán Sikkus. Olles prográmma gávnnat Saemien Studeenth Tråantesne Facebook-siiddus.
