Mannan lávvordaga lágiduvvojedje Davvi-Norgga meašttirgilvvut Donjevuonas. Deanu heaibunsearvi lea duhtavaš bohtosiiguin go viežžaledje máŋga medálja gilvvuin.
Deanu heaibunsearvvis ledje ovcci heaibu geat serve gilvvuide, ja Deanu heaibunsearvi šattai buoremus joavkun riikaoassegilvvus Davvi-Norgga meašttirgilvvuin (DNM).
Nubbin ledje Girkonjárgga heaibunsearvi Kirkenes AK ja Čáhcesullo heaibunsearvi Vadsø AK, dieđiha Deanu Heaibunsearvi preassadieđáhusas.
Máŋga medálja Detnui
Njealjis Deanu heaibunsearvvis viežžaledje silbbaid ja golliid. 130 kilosaš gilvoluohkás vuittiiga Mohammed Ghourli ja 50 kilosaš luohkás Tirill Bønå golliid.
Silbbaid viežžaleigga 67 kilosaš gilvvus Jaman Abdo ja 62 kilosaš gilvoluohkás fas Laila Ghourli.
Dasa lassin vuittii Deanu heaibunsearvvi Stina Marjavara Pettersen lassigilvvu Čáhcesullo heaibu vuostá.
– Stina sáhttá rehkenastit leat Davvi-Norggameašttirin go livččii galgan leat 80 kilosaš gilvoluohkás, ii ge lassi heaibun nieiddašjoavkkus, čállá Deanu heaibunsearvi maŋŋel gilvvuid.
Riikaoassegilvvus vuittiiga Sara M. Porsanger Anti ja Abdulaziz Abdo golliid, ja Steven Bønå silbba.
Nuoramusaide lágiduvvui maid gilvu ovdal DNM, ja Ali Abdo heaibbui bures 28 kilosaš gilvoluohkás.
