Boarrásat ledje herskkostallame go Ávvir finadii sin luhtte sámi álbmotbeaivvi.
Guovdageainnu buhcciidruovttus ledje čiŋahan sámi leavggaiguin ja maiddái ássit ledje čiŋadan eambbo go dábálaččat.
Doaibmajođiheaddji Karen Marianne Gaup muitala ahte sii leat juo herskkostallan iđđesbeaivve lákcagáhkuin ja lávlon sámi soga lávlaga.
– Mii leat gáhku borrán, lávlon ja mii leat maid geahččan árbevirolaš filmmaid. Dál mii galgat ges borrát bohcco čoarbbeali. Ja die lea min vuohki ávvudit beaivvi.
Gaup lohká ahte go sii eai sáhte almmolaš doaluide searvat, de lea liikká dehálaš ahte sii čalmmustahttet juoga ládje sámi álbmotbeaivvi.
– Ii láven ávvudit ovdal
Berit Anne Siri gii ássá Guovdageainnu buhcciidruovttus lohká ahte lea suohtas čiŋadit ja servvoštallat eará ássiiguin. Muhto ii loga gal ávvudan sámi álbmotbeaivvi ovdal.
– Mun in láven gal ovdal ávvudit dán beaivvi go ássen ruovttus, muhto dat han gal lea somá, lohká son.
Son lohká maid ahte lea buorre go sidjiide maid gillejit láhčit dákkár ávvudeami.