-Almmuhus-
OĐĐASATAvinor lasiha girdi Álttás odne

Avinor lasiha girdi Álttás odne

-

-

Ollu girdimátkkálaččat gullájedje Álttá girdišilju terminálas duorastatiđit maŋŋel bombaáitaga mii dagahii issoras balu. Dál lea Avinor bidjan liigegirdi mátkái.

Álttá girdišillju lea fas rahppon maŋŋel gaskavahkku akšuvnna, duođašta girdišilju doaibmahoavda Jens-Martin Nerdal NTB:i. Politiijaakšuvnnas dolvo girdimátkkálaččaid hoteallaide, ja muhtimat fertejedje vuordit terminálas.

– Leat muhtinnáre olbmo geat leat oađđán terminálas. Duorastaga bidjá Avinor liigegirdi sidjiide geat eai beassan mátkái ikte, lohká Nerdal.

 

Digitála diehtu

Ovdalaš gaskaija válde politiijat eret gielddusbáttiid ja loahpahedje bombaáitaga mii bođii digitálalaččat Norwegian flight DY320 mii girddii Oslos Áltái. Okta olmmoš áittii iežas leat girdis ja ahte sus lea bomba fárus.

– Dál leat geargan ohcamis. Mii leat álggahan dutkama gávnnahit gii dat bombaáitaga duohken lei. Eat hálit kommenteret lea go oktage gean navdit áššis, lohká operašuvdnajođiheaddji Bjørn Tormod Syversen NTB:i.

Politiijat válde gitta ovtta olbmo akšuvnnas, muhto luite su oalle jođánit áššis.

 

Ballet bávkaleamis

Politiijaid bombajoavku sáddejuvvui Oslos Áltái veahkkin akšuvnnas. Seammás gohččo politiijat Telenor ja Telia giddet neahta go akšunerejit Álttá girdišiljus. Neahtta lei jáddaduvvon sullii diimmu, ja lei fas doaimmas 21 áigge muhtin báikkiin Álttás.

– Mii giddiimet mobiilaneahta bargiid sihkkarvuođa dihte geat barge sajis. Go diehtit ahte sáhttá elektrovnnalaš veahkkeneavvuiguin doaimmahit dan mii sáhttá leat girdis, nu go bávkalit bomba, lohká Finnmárkku politiijaguovllu operašuvdnajođiheaddji Eirik Pedersen VG:i.

(©NTB)

 

-Almmuhus-