Čáhppes suovva leavai márkana bajábeallai go viessu buollái Bieskkángeainnus Kárášjogas. Buollinčáskadeaddjit leat jáddadan buollima ja bargame báikkis.
Politiijaide bođii diehtu 08:17 distatiđit ahte viessu lea buollime Bieskkángeainnus Kárášjogas.
– Heahteveahkit leat aiddo ollen báikái, lohká operašuvdnaguovddáža jođiheaddji Svein Erik Jacobsen Ávvirii beal ovccis iđđedis.
Viesu ássit leat dearvan, dieđihit politiijat Twitteris ahte sii leat ožžon viesu ássiid ságaide ja dihtet gos sii leat.
Suomas ja Porsáŋggus bohtet veahkkin
Badjelaš ovccis dieđihit 110-guovddážis ahte buollinčáskadeaddjit sihke Suomas ja Porsáŋggus leat jođus báikái čáskadit buollima veahkkin.
– Viessu lea oalát buollán, ja buot viessogerddiin lea buollime dál. Dál leat jáddadeame buollima, muitala 110-guovddáža operatevra Tom Henriksen Ávvirii.
– Báikkis lea buolaš, mii dagaha váttisin bargat čáskademiin, lohká Henriksen, gii ii loga ožžon dieđuid ahte leat bárttit jáddadit buollima.
Buollá
Ávvira reportár báikkis muitalii ahte go son joavddai báikái, ovdal buollinčáskadeddjiid, de lei vuos suovasteamen, iige oidnon dolla. Dál gal viessu lea buollimin.
Beal gávccis muitalii reportár ahte buollinčáskadeaddjit vásihit hástalusaid báikkis, eai ge lean álgán vuos čáskadit buollima.
Kárášjogas lea sullii 25 buolašgráda dál.
Maŋemus diehtu diibmu 11.30 dieđihuvvo 110-guovddážis lea ahte leat bissehan buollima, ja leat dál bargame loahppajáddademiin.
