Dál, go nuppes lea nohkan ohcanáigemearri dán beakkán virgái, de leat golbma ohcci. Okta sis lea sámediggedirektevra Jan Roger Østby.
Norgga Sámedikki gulahallanossodaga direktevra, Jan Roger Østby (51) Kárášjogas, lea ohcan NRK Sámi ođasredaktevravirgái.
NRK dieđiha dán virgái leat dál golbma ohcci, nisu gii ii almmut namas (32), NRK Sámi journalista Dan Robert Larsen (57) ja Østby, čállá Medier24.
Beakkán virgi
Dát lei nuppes go almmuhedje virggi, maŋŋel go vuosttaš vuorus eai lohkan gávdnan rievttes olbmo dan virgái.
Njealjis dat ledje vuosttaš vuorus ohcan dasa.
Dát virgi lea maid ožžon olu fuomášumi, go virgealmmuhusas ii gáibiduvvon sámegielmáhttu ohcciin.
Ovddeš bargobáikái
Jan Roger Østby lei 2009 rádjái NRK Sámis, gos lea bargan journalistan, vuorrohoavdan ja prošeaktaredaktevran.
Maŋŋel dan lea leamaš Sámedikki gulahallandirektevra.
– NRK Sápmi lea okta deháleamos ásahusain mii nanne giela, kultuvrra, servvodateallima ja sámi demokratiija. Dasa lassin dáhpáhuvvet ollu miellagiddevaš áššit mediasuorggis, earret eará ođđa mediadábiid dáfus. Mun háliidan danne NRK Sámi ovddidit ain viidáseappot, dadjá son aviisii.
