Dievdu gii lei čálašan kommentáraid Avisa Nordland Facebook-siiddus, ja váidon dan ovddas, ii mieđihan iežas sivalažžan ráŋggáštuvvot Sálttu diggegottis mánnodaga.
Dievdu gii lei čálašan kommentáraid Avisa Nordland Facebook-siiddus, ja váidon dan ovddas, ii mieđihan iežas sivalažžan ráŋggáštuvvot Sálttu diggegottis mánnodaga.
Mánnodaga ođđajagemánu 21. beaivvi lei ášši Sálttu diggegottis mas 51-jahkásaš dievdu lea áššáskuhtton vaššicealkámušaid ovddas.
Dievdu lea áššáskuhtton ráŋggáštuslága paragráfa 185 vuođul, almmolaččat ovddidan vealaheaddje- dahje vaššicealkámuša soapmásiidda sin čearddalaš duogáža dihte.
Ii loga baháid oaivvildan
Áššáskuhtton dievdu mieđihii dikkis ahte maŋit áiggis oinnii ahte lei mannan beare guhkás iežas suohttasiin, ii ge oaivvildan baháid dainna, čállá NRK Nordland.
Tor Haug, gii lea dievddu bealušteaddji, lohká ahte su klieanttas ii leat rasisttalaš dahje vaššás motiiva, ja deattuhii cealkinvuoigatvuođa mii Norggas lea, čállá NRK Nordland.
Vuordá duomu celkot
– In dál dieđe movt dat manai odne, lohká Hans Petersen, gii váiddii ášši politiijaide borgemánus mannan jagi.
Petersen muitala ahte sii ledje guđas boahtán čuovvut dikki, ja ahte medias ledje čieža journalistta čuovvume dikki Sálttu diggegottis.
Áktor evttohii 18 beaivvi evttolaš giddagasa ja 15 duhát ruvnno sáhku áššáskuhtton divdui.
Duopmo galgá celkot ovdal go guokte vahkku lea gollan.
