-Almmuhus-
-Almmuhus-
-Almmuhus-
OĐĐASATPolitiijat jáhkket čuigiid duššan muohtauđđasii

Politiijat jáhkket čuigiid duššan muohtauđđasii

-

-

Politiijat dieđihit bearjadaga ahte ohcanakšuvnna stáhtus lea rievdan nu ahte eai leat šat ohcame olbmuid geat leat heakkas, muhto ohcet olbmuid geat leat muohtauđđasii duššan.

Bearjadaga diibmu 14s lei preassakonferánsa uđasášši birra Romssa politiijaviesus mas politiijameašttir Astrid Nilsen, politiijaid bargiidhoavda Morten Pettersen ja klinihkkahoavda Mads Gilbert adde dieđuid mediaide.

Universitehtabuohcciviesu klinihkkadoavttir Mads Gilbert muitala preassakonferánssas ahte diibmu 12.30 čoahkkimis, mii sis lei bearjadaga beaivet, de leat árvvoštallan ahte láhppon olbmot eai leat šat heakkas, ja ahte leat duššan muohtauđđasii.

– Vejolašvuohta uđđasis beassat heakkas ii leat nu stuoris. Mii leat áibbas sihkkarat ahte vaikko livččiimet jođánit boahtán báikái, de eat livčče sáhttán ollet veahkehit sin geat leat muohttaga vuolde, lohká Gilbert.

 

 

Bearjadaga loktanii helikopter

Bearjadaga loktanii helikopter mainna ohcet signálarusttegiid Dápmotvuovddis. Dál leat gávdnan signálaid guovtti sajis gos muohtauđas lea fierran.

Guovtti sajis leat gávdnan signálaid, ja leat dál ohcagoahtán uđđasis. Politiijat muitalit ahte leat ohcame vel dan guokte signála maid eai leat vel gávdnan. Dan dieđiha Romssa politiijaguovlu bearjadaga ovdalaš diibmu 12:i.

 

Oktiibuot golbma helikoptera galget girde uđasbáikkis bearjadaga.

Ovtta universitehtabuohcceviesu helikoptera mielde leat uđasčeahpit geat galget árvvoštallat uđasvára.

Suodjalusas lea maid helikopter mas leat ohcanrusttegat maiguin ohcet láhppon olbmuid, ja nubbi helikopter mainna bávkalit eret luovos muohttaga várregilggas, dieđiha NRK.

 

Buoret dálki bearjadaga

Ambulánsahelikopter geahččalii girdit uđasbáikki lahka duorastaga, oaidnin dihte lea go dan mađe fiertu ahte sáhttet girdit ohcanrusttegiin mii heaŋgá helikopteris, muhto helikopter fertii jorgalit.

Suodjalus lea maid jorgalan go geahččaledje girdit báikkis duorastaga.

Dálki lea ložžen bearjadaga, muhto eai dieđe sihkkarit sáhttet go sáddet vuos gádjunvehkiid ohcagoahtit láhppon olbmuid.

Ledje maid ordnen rusttegiid maiguin ohcet mobiilasignálaid. Duorastaga eahkedis eai leat šat gávdnan mobiilasignálaid uđasguovllus.

 

Ohcet signálaid ohcanrusttegiiguin

Dan njealljásis, geat ledje čierasteame sábehiiguin Sarregáissás, ledje ohcanrusttegat mielde mat sáddejit signálaid nu ahte ohcanveahkit gávdnet sin jus uđđasa vuollai gevvet.

Golmmas leat suopmelaččat ja okta lea ruoŧŧelaš, ja buohkat leat badjelaš 30 jagi boarrásat.

– Uđassignála sádde signála ovttatládje, ja maiddái dalle go lea muohttaga vuolde. Dálá helikopteriin lea vejolaš goallostit ohcanrusttega helikoptera vuollai ja girdit uđasbáikki badjel ja oaidnit lea go signála doppe. Jus gávdnet signála, de sáhttet luoitilit leavgga dan báikái, vai ohcanveahkit dihtet gos galget ohcat, čilge Norgga Geoteknihkalaš Instituhta uđasekspearta Kjetil Brattlien VG:i.

 

Stuora uđas

Gaskavahkku lei stuora uđas Dápmotvuovddis ja njeallje olbmo leat dieđihuvvon láhppon.

Maiddái sabetluottat vuhttojit go soapmásat leat čierastan ja geavvan muohtauđđasii. Sabetluottat eai vuhtto ge šat viidáset, meattá uđasbáikki.

Uđas lea sullii 300 mehtera govdat ja 500-600 mehtera guhku, ja lea fierran bajimus oasis Sarregáissás mii lea 1442 mehtera alla várri Báhccavuona suohkanis.

Geologat leat vuorddašeame báikkis ja galget árvvoštallat uđasvára ohcanbáikkis. Politiijat dieđihit ahte Sarregáissás ja Dápmotvákkis láve dávjá fierrat uđas.

Bearjadaga beaivet, diibmu 14.00, áigot politiijat almmuhit eanet dieđuid preassakonferánssas Romssa politiijaviesus.

(©NTB)

 

-Almmuhus-