Almmuhus

Almmuhus

Facebook – boaraniid media

Anát go dávjá Facebooka? De it dáidde nu nuorra šat.

Almmuhuvvuon: 
Bearjadat, 11 Ođđajagimánu, 2019 - 08:36
Fáddásánit: 

Facebook orru massime beroštumi.

Dál leat nu olu nuorat hilgon dan sosiála media ahte lea šaddan «boaranmedian».

– Mu mielas lea dat hirbmadit rievdan nuoraid gaskkas. Čájehuvvo ahte Facebook ii leat šat nu go ovdal. Dat lea fáhkkestaga šaddan boaraniid neahttabáikin, dadjá Kantar Media márkanastindirektevra Kampanje.comii.

 

Bártnit unnidan eanemusat

Kantar Media lea iskan dan juovlamánus, ja gávnnahan ahte 43 proseantta álbmogis agis 15-29 jagi, lohket iežaset atnit unnit áiggi dál Facebookii.

Dušše guhtta proseantta sis lohket atnit eambbo áiggi dasa.

Iskkadeapmi maid čájeha ahte 74 proseantta álbmogis atnet Facebook juohke beaivvi. Jagi áigi lei dat lohku 79 proseantta.

Dievddut dahje bártnit dat leat erenoamážit unnidan Facebooka geavaheami.

28 proseantta jerron olbmuin vástidit sii golahit dasa unnit áiggi. Dušše 18 proseantta lohket atnit eambbo áiggi dan mediai.

 

Juohke nubbi unnidan stáhtusođastemiid

Bealli nuorain dadjet sii leat unnidan stáhtusalmmuhemiid maŋemis jagis.

Eará oassi dán iskkadeamis lei fas obbalaččat interneahttageavahemi birra.

55 proseantta dadjet sii leat beare olu neahtas, ja 16 proseantta dadjet ahte sii leat badjel guhtta diimmu neahtas juohke beaivvi. Mátketelefovdna lea váldosivvan dasa.

(Gáldu: NTB)

Ovdasiiddus dál