Ruvdnoprinsa Haakon galledii Leavnnja disdaga juovlamánu 12. beaivvi. Su plánas ledje kvenagiella mánáidgárddis, nuorat geain lea álggahanmokta ja fitnodatálggaheaddjit.
Gonagasviessu dieđiha iežaset neahttasiiddus ahte Leavnnjas son deaivvadii vuos Leavnnja sátnejođiheddjiin Aina Borchain ja Finnmárkku doaibmi fylkkamánniin Stian Lindgårdain.
Galledii mánáid ja nuoraid
Bærtua mánáidgárddi kvenaossodagas beasai ruvdnoprinsa Haakon deaivvadit mánáiguin, váhnemiiguin, bargiiguin ja eará resursabargiiguin geat juogadedje vásáhusaid kvena giellabeasi birra.
Maŋŋel son finai Leavnnja joatkkaskuvllas. Doppe son beasai gullat nuoraidráđi doaimmaid ja movt sii barget vai suohkan galggašii leat buorre báiki gos nuorat sáhttet orrut.
Son oaččui maid dieđuid álbmotdearvvašvuođaprošeavtta, «Ungdom i Fokus» ja nuoraidfitnodaga «Unge Øyne» birra. Son jotkkii maŋŋelgaskabeaivvi borademiin ja de beasai máistit báikkálaš herskuid.
Deaivvadii fitnodatálggaheddjiiguin
Ruvdnoprinsa finái maid bearašfitnodagas Banak leairras,mas lea suodjalanárvu, gos «Antikstore» ja «Juga Mikrobryggeri» leat.
Son deaivvai doaibmadoalli Alf-Emil Paulsena ja beasai váccašit vuoššahagas.
Levdnjii ledje maid boahtán eará fitnodatálggaheaddjit miehtá Finnmárkkus, geaiguin Ruvdnoprinsa beasai deaivvadit.