50 jagi maŋŋel go NSR vuođđuduvvui Guovdageainnus, deaivvada organisašuvdna seamma báikkis ávvudan dihte.
Mannan vahkkoloahpa lágiduvvui Guovdageainnus Norgga Sámiid Riikasearvvi (NSR) 45. riikačoahkkin.
Ođđa jođiheaddji
Runar Sámmol Myrnes Balto (31) válljejuvvui ovttajienalaččat NSR ođđa jođiheaddjin.
Ieš lei Balto duđavaš, ja doalaige sártni lávddi alde sidjiide geat ledje boahtán.
– Lea gudni válljejuvvot NSR jođiheaddjin, erenoamážiid go dán vahkkoloahpa lea NSR 50 jagi ávvudeapmi. Mun giittán riikkačoahkkima go čájeha luohttámuša munnje, dajái Myrnes Balto.
Nuorra jođihanjoavku
NSR lea maid válljen guokte nubbinjođiheaddji. Vidar Andersen (40), Romssas eret, lea politihkalaš nubbinjođiheaddji. Saia Stueng (25), Kárášjogas eret lea ges organisatuvrralaš nubbinjođiheaddji.
– Lean ilus go mus lea nuorra ja nanu jođihanjoavku fárus. 50 jagi doaimma maŋŋel lea NSRas čeavlás árbevierru, ja dan áigut áimmahuššát go ođđa buolva galgá ođasmahttit min organisašuvnna ja politihka, lohká Balto.
Ollu čuolmmaid áigot čoavdit
Son lea gearggus hástalusaide mat leat sámi servvodagas.
– Hástalusat leat ollu, ja NSR áigu leat njunnošis daid čoavdimis. Nu go ovdamearkka dihte sámegiela boahtteáigi, mainna galgat birget, movt čoavdit dálkkádatrievdamiid ja movt eastadit veahkaválddálašvuođa ja veagalváldimiid min servvodagas, dajái Runar Myrnes Balto.
50-jagi ávvudeapmi
Skábmamánu 30. beaivvi lei juste 50 jagi dassái NSR vuođđuduvvui 1968:s.
Dál, 50 jagi maŋŋel, deaivvadii riikasearvi seamma báikkis, ávvudan dihte dán stuora beaivvi.
Lávvordaga álggii ávvudeapmi Diehtosiiddas, gos olbmot besset gullat NSR jagiid birra.
Earret eará muitalii Odd Máhtte Hætta NSR álggu birra lávddis, ja maiddái geahčadedje presideanttat Ole Henrik Magga, Aili Keskitalo ja Sven Roald Nystø maŋos áiggis muittašan dihte.
Eallin Guovdageainnus
Riikačoahkkima ja ávvudoaluid oktavuođas lei ge Guovdageainnus mannan vahkkoloahpa hirbmat eallin.
Bearjadaga eahkes juoiggadedje Juoigalasat Alfreds Kroas guoimmuhan dihte olbmuid.
Lávvordaga ledje maiddái duojárat čoahkkanan Diehtosiidda feaskárii dujiideasetguin, ja lávvordateahkeda dolle Mari Boine, ISÁK ja Article 3 ávvukonseartta Báktehárjjis.
