Čoagginorganisašuvnnat eai leat goasse čoaggán nu ollu ruđa go dal. Báhtareaddjeveahkit, Norgga Rukses Ruossa ja Frelsesarméen leat organisašuvnnat mat leat eanemusat čoaggán. Dan čájehit Deloitte logut, mat leat váldon Fundraising-rapportas.
Siri Nodland, Norgga čoagginráđis, lohká norgalaččat leat udnolaččat ja álot leat buriin mielain dorjon.
– Dakko gokko mii láviimet álbmotgássain ovdal veahkehit, de leat norgalaččat álgán ruđalaččat doarjut, dadjá son preassadieđáhusas.
Oktiibuot háhke 2017:s 19,235 miljárdda ruvnno, mii lea lássanan 7,4 proseanttain 2016 rájes, dalle čoggojuvvui 17,915 miljárdda ruvdno.
Áddet eambbo sosiála mediain
Deloitte preassadieđáhusas muitaluvvo ahte sosiála media lea šaddan dehálažžan organisašuvnnaide go galget čoaggit ruđa.
Oallut organisašuvnnat muitalit ahte leat easka 2018:s geavahišgoahtán Facebooka go čogget ruđa, juoga mii čájehuvvo ahte dat doaibmá bures.
Go buohtastáhtta 2011 loguiguin, de lea sosiála media lássanan ollu, sihke márkanfievrredeapmin ja čoagginkanálan.
Ilolažžat doarjaga ovddas
Márkanfievrrideapmikánalan lea Facebooka ráđđejeaddji. Eanas organisašuvnnat geavahit Facebooka márkanfievrrideapmin.
– Dat ruđat leat hui dehálaččat olbmuide miehtá máilmmi. Mii leat nu ilolaččat doarjaga ovddas mii dagahii ahte mii beasaimet veahkehit 8,7 miljovnna olbmo mat leat báhtaran soađis ja soahpameahttunvuođas, lohká Nodland.
