Bargiidbellodaga sámediggejoavku ohcala ahte nissonolbmuid rahčamuš boazodoalus galggašii eambbo čalmmustahttojuvvot boazodoallošiehtadusas.
– Mii oavvildit ahte nissonolbmuid buktu lea dehálaš oaidnin dihte boazodoallobuktaga obbalaččat, ii ge dušše biergobuktaga ektui, lohká ealáhus- ja kulturlávdegotti jođiheaddji, Arild Pettersen Inga ovttas Per Mathis Oskaliin ja John Kappfjellain Bargiidbellodaga sámediggejoavkkus.
Eambbo čalmmustahttima
Bargiidbellodat dáhttu eambbo fuomášumi ja čalmmustahttima nissonolbmuid saji boazoealáhusas.
– Nu go dál lea, de ii boađe ovdan nissonolbmuid rahčamuš viessodoalu ja boazoealáhusa obbalašekonomiijas, lohká Arild preassadieđáhusas.