Foanda galgá leat veahkkin go čuožžilit heahtedilit mat bohtet dálkkádatrievdamiid geažil.
NSR, NSR-SáB, Guovddášbellodat ja johttisápmelaččaid listtu dáhttot iežaset cealkámušain 2019/2020 boazodoallošiehtadussii álggahit dálkkádatheivehusfoandda boazodollui.
– Dálkkádatrievdamat leat muhtin dain stuorámus hástalusain midjiide Sámis, ja juo dál dovdat mii dálkkádatrievdamiid boazodoalus. Rievdadusat gevvet jođáneappot go ovdal doaivvuimet, ja mii boazodoalus fertet nuppástuhttit iežamet dál, lohká Mathis Nilsen Eira preassadieđáhusas.
Jahkásaččat 10 miljovnna
Ovttasbargoguoimmit Sámedikkis evttohit boazodoallošiehtadussii álggahit foandda masa jahkásaččat biddjo 10 miljovnna ruvnno, mii galgá geavahuvvot heahteveahkkin ja dálkkádatheivehussan boazodollui.
– Dálkkádatfoanda sáhttá veahkehit badjeolbmuid hálddašit vuorddekeahtes váttisvuođaid mat bohtet dálkkádatrievdamiid geažil, ovdamearkka dihte johtima vuolde ja fuođđarháhkamii, lohká Eira.
Son deattuha duođalašvuođa das ahte váldit dál juo vuhtii dálkkádatváttisvuođa boazodoalus.
– Geasset oinniimet ahte eanandollui čuzii goikkádat garrasit. Dálkkádatfoanda sáhttá leat veahkkin go boazodoalus bohtet sullásaš hehtedilit. Mii fertet dál juo váldit vuhtii dán váttisvuođa, go mis ii leat ráđđi čohkkát ja vuordit, lohká Eira vel.
