Brihttalaš boazofárpmat eai mieđit sii illastit dahje biinnidit bohccuid, muhto čuoččuhit sii baicca dikšot daid bures.
Ávvir čálii ášši ikte, mas elliidsuodjalanorganisašuvdna Animal Aid lea almmuhan video mas brihttalaš boazofárpmat oidnojit illasteame ja gáržásis doalaheame bohccuid juovlačájáhusaid váste.
Jagiid 2014 -2017 sáddejedje Sámis 571 ealli bohcco dohko.
Isket ieža bohccuid
Kent Reindeer Center boazofárpma ovddasteaddji vástida The Independent aviissas moaitagiidda mat leat boahtán sin boazofárpma vuostá.
– Mii váldit elliidčálggu duođalaččat ja bohccuid isket min iežamet šibitdoaktárat jeavddalaččat. Mii dikšut dákkaviđe dearvvašvuođa váttisvuođaid, vaikko muhtin sivat sáhttet bistit guhkit. RSPCA elliidsuodjalanorganisašuvdna lea leamaš iskame bohccuid, eai ge oaidnán dárbbu makkárge liige dikšui.
Eai mieđit doalaheame gáržásis
Aviissas lea maid Cheshire Reindeer Lodge boazofárpmas vástádus moaitagiidda:
– Min bohccot leat hirbmat bures dikšojuvvon, dain lea rivttes deaddu, eai ge leat dušše guđđojuvvon dállui. Jus dakkár govat leat, dat eai čájet duohtavuođa. Mis leat rabas gárddit ja stálljat, ja áidna dilálašvuohta go bidjat daid gáržásii, lea go galgat sirdit dahje dikšut daid.