Muhto olbmot eai dárbbat ballat.
Romssa politiijat dieđihit ahte olbmot bohtet odne deaivat olu uniformerejuvvon soalddáhiid ja politiijaid Romssa gávpotguovddážis.
Dát ii dattetge leat ballanveara, go politiijain ja Suodjalusas lea odne stuora hárjehallan Storgatas Romssa gávpotguovddážis.
Politiijat dieđihit ahte sis leat doaimmat doppe odne 08:00 rájes 17:00 rádjai.
Ovttasbarget
Politiijat ja Suodjalus ovttasbarget hárjehallamiin dannego sii oktasaš hárjehallama ja oahpahusa čađa ohppet ovttasbargat ja dovdagohtet nubbi nuppi resurssaid ja doaibmannávccaid buorebut.
– Lea dehálaš ahte Suodjalus ja poltiiijat ovttasbarget ráhkadahttit buori gearggusvuođa, vuoi sáhttit buorebut ávkkástallat servodaga gearggusvuođaressursaiguin, čállet politiijat iežaset neahttasiidduin.
