-Almmuhus-
OĐĐASATSámedikki raporteren ILO:i 2018:s

Sámedikki raporteren ILO:i 2018:s

-

-

Sámediggi mearridii maŋemus dievasčoahkkimis raportta ILO-konvenšuvnna nr. 169 ektui álgoálbmogiid ja čearddalaš álbmogiid hárrái iešmearrideaddji stáhtain.

Norga raportere ILO-169 birra ILO áššedovdilávdegoddái juohke viđat jagi.

ILO áššedovdilávdegotti maŋemus kommentárat raporteremiidda ja gažaldagat Norgii vuostáiváldojedje 2015:s.

Norgga 6. raporta, mas kommentáraid vástidit, lea leamaš gulaskuddamis ja gulaskuddanáigemearri lei miessemánu 9. beaivvi 2018. Sámedikki maŋemus raporta lea áigodagas 2013 geassemánu rájes gitta 2018 miessemánu rádjai.

 

Meannuduvvui dievasčoahkkimis

Sámedikki raporteren ILO-konvenšuvnna nr. 169 ektui álgoálbmogiid ja čearddalaš álbmogiid hárrái iešmearrideaddji stáhtain meannuduvvui dievasčoahkkimis čakčamánus čuovvovaččat: 

Sámediggi čujuha raportii man Norgga stáhta lea dahkan ILO-konvenšuvnna nr 169 birra álgoálbmogiid ja čearddalaš álbmogiid hárrái iešmearrideaddji stáhtain (ILO-169) áigodahkii 01.06.2013 – 31.05.2018.

 

– Sámediggi vuordá ahte stáhta láhčá stáhtalaš ekonomalaš ja juridihkalaš rámmaid nu ahte Sámediggi galgá sáhttit doaimmahit sámi servodatovddideami. Sámi álbmot eallá lávgalagaid norgalaš servodagain ja lea eanaš háviid sorjavaš das ahte Norgga stáhta váldá vuhtii sámiid ja heiveha lágaid, doaibmabijuid, ortnegiid ja Norgga almmolaš bálvalusaid sámiide, čállá Sámediggi preassadieđáhusastis.

 

Sámediggi deattuha sávaldaga ahte oažžut stuorát láhkaásahusválddi ja hálddašanovddasvástádusa servodatsurggiin mat váldoáššis gusket sámi álbmogii. Sámedikki mielas lea deaŧalaš prinsihppa ahte lágaid Norggas mearrida Norgga láhkaaddiváldi, Stuorradiggi.

 

– Stáhta ii dattetge sáhte mearrádallat Sámedikki  badjel, ja ferte danne čielgasit boahtit ovdan lágas makkár ovddasvástádussurggiin lea Sámedikkis váldi, čállá Sámediggi. 

 

Sámediggi áigu dán vuođul sáddet raportta Norgga beale Sámedikki beales ILO-konvenšuvnna nr 169 birra álgoálbmogiid ja čearddalaš álbmogiid hárrái iešmearrideaddji stáhtain (ILO-169) áigodahkii 01.06.2013 – 31.05.2018 ILO áššedovdilávdegoddái.

 

 

-Almmuhus-