-Almmuhus-
OĐĐASATBiilalihkohisvuohta Gorbovuonas

Biilalihkohisvuohta Gorbovuonas

-

-

Vihtta olbmo mielde lihkohisvuođas.

Odne iđđedis ožžo politiijat dieđu biilalihkohisvuođa birra Gorbovuonas.

Dan dieđihit Finnmárkku politiijat Twitteris.

– Heahteetáhtat leat báikkis. Hui gálja luottat, čállet sii.

 

Sáddejuvvon Sea King mielde buohccivissui

Politiijat dieđihit ahte lea sáhka roasmmehuvvamis, muhto eai dieđe man garrasit olbmot leat roasmmehuvvan.

Finnmárkku politiijaguovllu operašuvdnajođiheaddji Jan Arne Pettersen lohká ahte biillain leat njunit beaškkehan oktii.

– Nuppi biillas galget leamaš guokte olbmo ja nuppis fas guokte máná ja okta rávisolmmoš, lohká Pettersen.

– Golmmas, geat ledje mielde lihkohisvuođas, leat sáddejuvvon buohccivissui Hámmárfestii, ja guovttis fas doavtteriskosii báikkálaččat, dadjá son.

 

Hirbmat gálja luottat

Pettersen lohká Ávvirii ahte lihkohisvuohta deaivvidii go nubbi biila bođii boasttu kjørefelt alde. 

Son lohká gálja luotta leat stuora ággan lihkohisvuhtii.

– Iđđedis ledje hirbmat njalka luottat, ja lea jáhkehahtti ahte lihkohisvuohta dán geažil deaivvidii.

 

-Almmuhus-