Finnmárkku buohcciviessu fárregoahtá dán mánu ođđa buohccivissui Girkonjárggas.
Njealji vahkkus galget leat fárren, geahččaladdan rusttegiid ja sirdán pasieanttaid. Ovttasráđiid fágačehpiiguin Girkonjárgga buohcciviesus álggahit fárrenplána čakčamánu loahpas.
– Sirdit buohcciviesu lea viiddis prošeakta, gáibida plánema ja olu vehkiid. Veahkkin mis leat báikkálaš searvvit geat áigot veahkehit fysalaš fárremin. Ieš dat fárren čuovvu bienalaš plána, dadjá prošeaktahoavda Lill-Gunn Kivijarvi preassadieđáhusas.
Klinihkkahoavda Rita Jørgensen lohká iežaset illudit fárret ođđa ja ođđaáigásaš buohccivissui.
– Illudahtti go stádaministtar ja dearvvašvuođa- ja fuolahusministtar boahtiba dan almmolaš rahpamii mii lea golggotmánu 12. beaivvi.
Rahpanbeaivvi šaddá dasa lassin rahpanfeasta bargiide, ja maŋŋel bovde Finnmárkkubuohcciviessu buot Girkonjárgga ássiid rabas beaivái buohccivissui.
– Dalle lea vejolaš beassat oaidnit man fiinnis lea šaddan, dadjá Jørgensen.
