Boazopolitiijat dieđihit buriid bearráigeahččobohtosiid dán rádjái ealgabivddu oktavuođas Guovdageainnus ja Kárášjogas.
– Lea šaddan dáhpin ahte min veahka lea báikkis ealgabivddu oktavuođas sihke Kárášjogas ja Guovdageainnus. Mii muittuheimmet ealgabivdiid ovdagihtii maid galget muitit. Dán rádjái leat leamaš movttiidahtti bohtosat go čuvvot lága, muitala boazopolitiijaid hoavda, Inger Anita Øvregård preassadieđáhusas.
Ealgabivdit čuvvon lágaid
Dan rájes go ealgabivdu álggii čakčamánu 1. beaivvi Sis-Finnmárkkus leat 58 ealgabivdi dárkkistuvvon.
– Min olbmot leat fitnan oktiibuot 24 bivdobáikkis eai ge makkárge mearkkašumit leat registrerejuvvon ealgabivdiin. Dat lea hui buorre, dadjá Øvregård.
Dasa lassin leat 11 rievssatbivdi dárkkistuvvon. Dat lea dagahan ovtta váidaga váilevaš bivdokoartta geažil, dasa lassin go ledje beare olu patrovnna bissus.
Bissu duoguštuvvui.
Finnmárkku politiijat leat hui duhtavaččat bivdiiguin geaid leat dárkkistan.