Geaidnopolitiijat leat dárkkistan johtolaga Porsáŋggus ja njealjis šaddet máksit sáhku alla leahtu ovddas.
Geaidnopolitiijat ledje gaskavahkku dárkkisteame man alla leahttu biillain lea báikkis gos lea alimusrádji 70 kilomehtera diimmus (km/d). Politiijat leat čállán njeallje sáhku alla leavttu ovddas, ja biila mas lei alimus leahttu mihtiduvvui vuodján 95 km/d.
Politiijat bissehedje maid ovtta dievddu, gii lea badjelaš 20 jahkásaš, go lei gárrenoaivvis vuodjime biillain. Politiijat válde sus vuodjinkoartta, dieđiha Finnmárkku politiijaguovlu Twitteris.
