Vuosttaš sisaváldin joatkkaskuvllaide lea dál gárvvis

Suoidnemánu 13.beaivvi lea áigemearri vástidit váldá go vuostá fállojuvvon oahpposaji. Dát guoská sidjiide geat eai leat vuos golahan golbma vuosttaš skuvlajagi joatkkaskuvllas.

Eará ohccit ožžot ges fálaldagaid suoidnemánu 18.beaivvi, dieđiha fylkkasuohkan sin neahttasiiddus.

Lohku lassána

Dan 3009 ohcciin leat 2767 ohcci ožžon fálaldaga álgit oahpuide fylkkagieldda joatkkaskuvllaide, ja 242 ohcci ges ožžon fálaldaga álgit sámi joatkkaskuvllaide maid stáda eaiggáda.

– 87 proseantta dáin ohcciin leat Finnmárkkus eret. Go nubbi oahpposaji fálaldatoassi čađahuvvo, de láve dat lohku lassánit. Muhtimat leat ain oahpposaji haga, muhto buohkaide lohpiduvvo fálaldat go skuvllat álget čakčii, muitala Toni Elisabeth Håvardsrud.

Gealbolokten maŋemus jagiid

Bivnnuheamos fálaldagat leat Teknihkka- ja industriála buvttadeapmi, Elektrofága, Dearvvašvuođa- ja bajásšaddan, ja oahppospesialiseren.

– Ollugat geat ohcan beassat mohtorvuoján ohppui. Álttá joatkkaskuvllas leat lasihan ovtta luohká fágas, ja   sisaváldinlisttu lea devdon vuosttaš sisaváldimis. Seammá fága Leavnnjas ja Guovdageainnus lea maid sisaváldinlisttu dievva, muitala Toni ja joatká:

– Ollugat leat maid ohcan lassi jagi čađahit maŋŋel go leat geargan fágareivviin. Dát rievdadus bođii guokte jagi dás ovdal, ja ollu nuorat leat ohcan lassi jagi ja dan dihte ožžon viiddiduvvot nuoraidrievtti jagiin. Dán jagi leat lasihan lassi jagi Hámmárfeasttas.

Ođđa oahppu Deanus

Detnui lea álggahuvvon ođđa oahppu mas beasat beatnagiiguin oahppat vuodjit. Das leat 22 olbmo vuordinlisttus ja oahppu lea hirbmat bivnnut. Dušše gávccis besset dán ohppui, ja nuorat olles Norggas besset ohcat dán ohppui.

Sámi joatkkaskuvllat

Sámi joatkkaskuvllas Kárášjogas leat 171 oahpposaji olles skuvllas. Maŋŋel vuosttaš sisaváldima leat ain 33 saji rabas.

Sámi joatkkaskuvla ja boazodoalloskuvllas Guovdageainnus leat ges 158 oahpposaji.  Doppe leat 43 rabas saji maŋŋel vuosttaš sisaváldima.