-Almmuhus-
OĐĐASATČállán buoremus masterbarggu

Čállán buoremus masterbarggu

-

-

Aslak Holmberg gárvii iežas masterbarggu, «Bivdit luosa», mannan giđa, ja dainna oaččui son «Dan jagáš buoremus masterbargu mas lea eamiálbmotfáddá» Riddu Riđus. 

Lea vuosttaš geardde go UiT Sámi dutkamiid guovddáš geige «Árdna» bálkkašumi dan buoremus masterbargui mas lea eamiálbmotfáddá. Dan mearridedje sii geiget Riddu Riđus. 

 

Luossa ja Deanučáhcádat

 Áslat Holmberg lea dutkan sámi árbedieđu mii laktása lussii ja Deanučahcádahkii ja muđuige áššiide mat gusket ja čuhcet lussii. 

 

Hálidii bájidit máhtu ja dieđu

Holmberg muitala ahte son geahččalii iežas čállimiin bajidit sámi luossadiehtovuogádaga. 

– Dan maid mun duođai háliidin iežan čállimiin bajidit lei sámi dieđu ja máhtu luosa birra. Ja viggat dan lahkai bargat ahte sámi diehtu boađášii mielde dutkamii ja hálddašeapmái Deanu luosa birra. 

 

Guovllu vuoigatvuođat ja dutkan

Holmberg lea guorahallan dieđu buhtadeami ja dutkama ja maiddái dan hálddašeami. 

– Dan ahte makkár rolla doppe lea sámi árbedieđus ja makkár galggašii leat. Lean dutkan sihke vuoigatvuođaid ja dutkama dán guovllus. 

 

Rahčan iežas bargguin

Son lohká iežas hui movttegin go dakkár bálkkašumi oaččui iežas bargguin. 

– Lean guhká rahčan dainna bargguin, ja de lei ge earenoamáš somá go ožžon dakkár beroštumi. 

 

Rivttiid ja diehtovuogádaga fuomášupmi

Son lohká iežas sávvat ahte su bargu nagodivččii loktet vel eanet fuomášumi eamiálbmoga rivttiide ja diehtovuogádaga.

 

Loktet vel eambbo oidnosii

UiT Sámi dutkamiid guovddáža professor Torjer Olsen muitala ge ahte lea vuosttaš geardde go Romssa universitehta geige dakkár bálkkašumi. 

– Romssa universihtetas čállojuvvojit ollu masterbarggut eamiálbmogiid birra, ja dainna bálkkašumiin mii áigut ge loktet vel eambbo oidnosii eamiálbmoga. 

 

Máŋga masterbarggu nominerejuvvon

Ledje čieža masterbarggu nammaduvvon dan bálkkašupmái.

– Lei hirbmat váttis gávdnat vuoiti, lohká Olsen.  

 

Garrasit bargan bargguin

Olsen lohká sin hirbmat movttegin go dakkár bálkkašumi besse geiget, ja earenoamážit lei hui somá sutnje go lea leamašan Aslak Holmberga oahpaheaddji. 

– Dieđán ahte Aslak Holbmerg lea bargan garrasit dainna bargguin ja lea bargan fáttáin mii lea hui dehálaš, loahpaha son.  

 

Geahča govaid bálkkašumi geigendilálašvuođas:

-Almmuhus-