-Almmuhus-
-Almmuhus-
-Almmuhus-
OĐĐASATVálmmašvuođatelefuvdna boraspirevahágiidda

Válmmašvuođatelefuvdna boraspirevahágiidda

-

-

Finnmárkku Fylkkamánni lea ásahan válmmašvuođatelefuvnna mii lea dál gearggus vástidit boraspiriid guoskevaš áššiid.

Birasdirektoráhtta lea addán Finnmárkku Fylkkamánnái dihto eriid báhčinlobiide bivdin dihte boraspiriid. Dat hálddašuvvojit áigodagas geassemánu 1. beaivvi gitta guovvamánu 15. beaivvi rádjái. Dakkár boraspiret mat dahket vahágiid leat earret eará geatkkit, albasat, guovžžat ja gumppet. Gonagasgoaskima báhčinlobiid hálddaša Fylkkamánni birra jagi.

 

Válmmašvuođatelefuvdna

Finnmárkku Fylkkamánni lea rahpan válmmašvuođatelefuvnna boraspiriid guoskevaš áššiin áigodagas geassemánu 1. beaivvi gitta golggotmánu 15.beaivvi rádjái. Válmmašvuođatelefuvdna lea rahppon dan dihte vai sáhttit jođánit meannudit báhčinlohpeohcamušaid dalle go boraspiret leat dahkan vahágiid. Dasa lassin, dárbbu mielde, sáhttá váldit oktavuođa Birasdirektoráhta válmmašvuođatelfuvdnii boraspiriid guoskevaš áššiin.

 

Áššit maidda sáhttit vástidit go riŋget váktaáigodagas:
– Báhčinlobiide guoskevaš ohcamušaid birra ja čuovvoleapmi go leat geahččalan bivdit.
– Ohcamušat jođánis eastadandoaibmabijuin dalle go boraspire lea dahkan vahágiid.
– Gulahallan bivdojoavkkuiguin.
– Vuostái váldit dieđuid elliid birra mat leat báhččon, vahágahtton dahje jus ii leat deaivan.
– Gulahallan SNO:in ja šibit-/sávza-/boazoeaiggádiin go leat geahččalan bivdit vahátdahkki boraspire.

Jus eahpidat ahte eallit maid guođohat leat lápmašuvvan ráfáidahtton boraspiriid geažil, de berret váldit oktavuođa juogo báikkálaš Stáhta Luonddubearráigeahčuin (SNO), boraspireoktavuođaolbmuin dahje regiuvnna boraspireovddasvástideddjiin Magne Asheimiin, dárkkistan dihte ráppiid. Dan maŋŋá berret váldit oktavuođa Finnmárkku Fylkkamánniin vai sáhttit ráđđádallat maid bargat viidáset, ovdamearkka dihte bivdit vahátdahkki boraspire dahje bidjat johtui eará doaimmáid eastadan dihte vahágiid. 

Unjárgga, Porsáŋggu, Mátta-Várjjaga ja Deanu gielddain leat iežaset bivdojoavkkut. Dát bivdojoavkkut galget ovddemus geahččalit bivdit vahátdahkki boraspiriid. Gielddain lea ovddasvástádus hálddašit dáid bivdojoavkkuid ja danin singuin galgá váldit oktavuođa nu árrat go vejolaš jus áigu ohcat bivdolobi vahágiid geažil maid boraspiret leat dahkan. 

-Almmuhus-