-Almmuhus-
OĐĐASAT– Mii fertet vuoruhit gávpotsápmelaččaid

– Mii fertet vuoruhit gávpotsápmelaččaid

-

-

Bargiidbellodaga sámediggejoavku vuoruha 150 000 ruvnno rievdaduvvon bušeahtas Romssa Sámi viesu ovdaprošektii.

Bargiidbellodat lea sádden preassadieđáhusa mas muitalit ahte vuoruhit 150 000 ruvnno Romssa sámi vissui.

– Mii leat oaidnán ahte sámiid lohku gávpogiin lea duppalaston maŋemus logi jagis, ja Romssas leat dál 1400 sámi geat gullet Sámedikki jienastuslohkui, lohká Gáisi válgabiirre Bargiidbellodaga Synnøve Søndergaard preassadieđáhusas.

 

Evttoha dáiddamusea vistti

– Mii diehtit ahte Romssa suohkan geahčada vejolašvuođaid ásahit sámi viesu Romsii. Ovddeš dáiddamusea visti, man Romssa suohkan lea aiddo oastán, livččii hui vuogas doaimmaide mat lunddolaččat gullet dakkár sámi vissui. Kultuvra, hálddahus, deaivvadanbáiki ja giellakafea, namuhan dihte muhtin doaimmaid. Muhto ii leat min duohken mearridit dan, lohká Søndergaard.

Son deattuha ahte dát lea juste nu go Bargiidbellodaga sámediggejoavkku politihkka lea. 

– Go lea vejolašvuohta bušeahtas, de áŋgiruššat Romssa gávpotsámiid ovddas ja sámi viesu ovddas, nu go lohpideimmet válggain, lohká son preassadieđáhusas.

-Almmuhus-