Norggas ferte aktiiva rolla Suoma/Norgga ruovdemáđijačielggadeamis. Árktalaš ruovdemáđijaoktavuohta lea dehálaš eurohpálaš prošeakta mas boahtá leat stuora váikkuhus gilvofápmui ealáhusdoaimmas miehtá Davvikalohta.
Suopma – Finnmárku
Váldolávdegotti jođiheaddji Geir Ove Bakken lea duhtavaš go višuvdna, man ráhkadahtte searvevuođas máŋgga birrasis 2017:s, dál čuovvoluvvo Suoma/Norgga čielggadeamis, ja galgá árvvoštallat vuođu ruovdemáđidjii gaskal Roavvenjárgga ja Girkonjárgga dán jagi.
Ferte leat aktiiva
– Mu mielas lea lunddolaš ahte Finnmárkku fylkkagielda lea aktiiva dán proseassas, dadjá Bakken preassadieđáhusas, ja muitala viidáset ahte fylkkagielda lea juo fátmmastan čielggadeapmi, áirasa bokte stivrenjoavkkus.
– Dá lea dehálaš eurohpalaš prošeakta mas lea stuora mearkkašupmi gilvofápmui ealáhusdoaimmas Davvikalohtas ja maiddái ovdáneapmái Norgga-Suoma ovttasbarggus.