Nu go ovddit ija, de lei Finnmárkku politiijain maid mannan ija olu bargu.
KÁRÁŠJOHKA
Vuollel 20-jahkásaš bárdni bissehuvvui go politiijat várohedje su gárrenoaivvis vuodjime. Sus válde álkoiskosa, mii lei positiiva. Son váldojuvvui mielde doaktára lusa válddihit varraiskosa. Dás ásahuvvo ášši.
ÁLTÁ
Lákkovuonbađas ožžo politiijat dieđu lávvordaga ahte badjelaš 70-jahkásaš dievdoolmmoš lea gahččan merrii. Buot veahkkeveagat vuoddjájedje báikái. Dievdoolmmoš lei ieš beassan gáddái, ja dolvojuvvui helikopteriin buohccevissui.
Gávvuonas lei garra biegga bosádan campingvovnna, mii lei olu cuovkanan. Politiijat leat dieđihan dáhpáhusa eaiggádii.
Gávpotguovddážis gávdne politiija olbmo gii lei bádjelmeare gárremiin. Su vuodjihedje ruoktot.
Badjelaš 40-jahkásaš válddahalai gárrenoaivvis vuodjime. Loga eanet dan birra dás.
Politiijat čađahedje restoráŋŋadárkkisteami. Buot lei ortnegis.
Politiijat gohččo golbma olbmo guođđit gávpotguovddáža rigerema dihte. Buohkat jeagadedje gohččuma ja vázzájedje ruoktot.
Politiijat bissehedje biilla mii ii leat leamaš biiladárkkisteamis, ja gálge das eret šilttaid.
Muhtun priváhta viesus lei garralágan feasta, ja politiijat fitne doppe bisseheame feastta.
ČÁHCESUOLU
Politiijat fitne muhtun priváhta feasttas gos čuojahedje beare jitnosit musihka. Feastaoasseváldit lohpidedje bissehit musihka.
Politiijat iske maid olgobáikkiid, gos ii lean mihkkege mearkkašit.
HÁMMÁRFEASTA
Guokte olbmo leigga doarrán olggobealde olgobáikki, badjelaš 20- ja 30-jahkásaš. Politiijat fitne bisseheame riiddu ja gohččo sudno guođđit gávpotgovddáža. Das ásahuvvo ášši.
Politiijat gohččo badjelaš 30-jahkásaš nissonolbmo guođđit gávpotguovddáža rigeara dihte. Son ii jeagadan sin, ja politiijat ásahit de ášši dáhpáhusas.
DONJEVUOTNA
Politiijat čađahedje restoráŋŋadárkkisteami. Jaskat olgobáikkiin, ii ge leat mihkke mearkkašit.
GIRKONJÁRGA
Johtolatdárkkisteapmi čađahuvvon, ja politiijat dárkkistedje 47 vuoddji. Okta álkiduvvon sáhkku go ledje beare olu olbmot biillas, ja okta cuigehus go biilalásiin ledje sevnnjodahttinfilmmat.
