76-jahkásaš dievdu, gii gaskavahku dieđihuvvui láhppon Kárášjogas, lea gávdnon.
Ohcanveagat vulge gaskavahku gaskabeaivve áigge ohcat, ja dievdu gávdnui moadde diimmu maŋŋel.
Ohcanveagat vulge Ájonjárggas lulás Dilljáskáiddi guvlui. Dievdu gávdnui sullii guokte kilomehtera biilaluottas eret.
– Dievdu, gii lei dieđihuvvo láhppon, gávdnui duššan ovdalaš golmma gaskavahku. Gávdnui jogas, čállet Finnmárkku politiijat Twitterii.
– Doddjon johkii
Dievdu gávdnui Divrranjogas. Sea King helikopter gávnnai su.
– Son orru doddjon johkii, dan sáhttit duođaštit, lohká Finnmárkku politiijaid operašuvdnajođiheaddji Eirik Pedersen.
Politiijat eai dieđe goas lihkohisvuohta lea dáhpáhuvvan.
– Diehtit dušše ahte son vulggii mátkái sotnabeaivvi. Eat dieđe goas lei galgat leat ruovttoluotta, muhto orru nu ahte ii galgan jávkat guhkit go beaivvi, lohká Pedersen.
Politiijat álggahit dutkanášši. Oapmahaččat leat ožžon dieđu.
Politiijat ja ohcanveagat leat loahpahan iežaset barggu otnážii.
– Eahpelunddolaš
Ohcanakšuvdna álggahuvvui gaskavahku gaskabeaivve áigge. Beal viđa-áigge dieđihit politiijat fas ahte dievdu lea gávdnon.
Olu veagat ledje mielde ohcanbarggus. Ii okta ge lean oaidnán dievddu sotnabeaivvi rájes, go son vulggii čuoiganmátkái Dilljaskáidái, sullii miilla lullelis Kárášjoga čoahkkebáikki.
Muhtun, gean mielas lei eahpelunddolaš ahte dievddu biila lei čužžon luoddaguoras máŋga beaivvi, lei cavgilan politiijaide.
