Go Romssa politiijat ožžo dieđu «luoitilit visot mii lea gieđaid gaskkas» de dahke ge justa nu, ja adde aiddo duoguštuvvon narkotihkaid ruovttoluotta muhtin albmái.
Almmái bissehalai duollus Romssa girdišilljus, 1,2 grámma marihuanain ja golmmain pusežiin main oktiibuot lei 50 grámma «amas mirko» skábmamánu 11. beaivvi diibmá, čállá Nordlys.
«Luoitilit visot»
Duollus gohččo politiijaid báikái ja adde mirkkuid politiijaide. Dasa lassin duoguštedje politiijat guokte mátketelefovnna ja guokte niibbi, ja mearridedje ahte almmái galgá dolvojuvvot politiijastašuvdnii.
Go almmái lei biddjon biilii, de politiijabálvát ožžo fáhkka dieđu ođđa dáhpáhusa birra, mas lei sáhka ahte politiijat galge vearjoakšuvnna čađahit. Diehtu lei ahte galge luoitilit buot mii leažžá gieđaid gaskkas ja vuolgit eará báikái.
Politiijat luite albmá, ja moivvis mii čuožžiii, jávke maiddái duogušteamit maid ledje dahkan. Dat fuomášuvvui go Duolloetáhta fálai iskat amas mirkko.
Veahá heahpahan politiijabálvá šattai dalle mieđihit ahte lea addán dan ruovttoluotta albmái.
– Erenoamáš dáhpáhus, mii ii leat riekta gieđahallon, vástida Romssa politiijaguovllu politiijameašttir Ole Bredrup Sæverud.
Sii ieža dieđihedje dáhpáhusa Politiijaáššiid Erenoamášossosii, gos leat konkluderen ahte politiijaid dagu sáhttá moaitit, muhto eai leat lobihuššan.
(©NTB)
