-Almmuhus-
OĐĐASATStáhtabargiid bálkášiehtadallamat boatkanan

Stáhtabargiid bálkášiehtadallamat boatkanan

-

-

Sotnabeaivvi čuovganeapmái dieđihii YS ahte šiehtadallamat leat boatkanan.

 

 

– Mii garrasit geahččaleimmet oččodit šiehtadusaid mas leat buot dat njeallje váldoovttastumi stáhtas, muhto dat ii lihkostuvvan, lohká gielda- ja ođasmahttinministtar Monica Mæland preassadieđáhusas.

Stáhtašiehtadallamat gártet ge dasto soabaheapmái, mas áigemearri dievvá miessemánu 23. beaivvi.

– Mii eat nagodan lahkonaddat, nu ahte ii lean eará čoavddus, lohká LO Stat fágasearvvi jođiheaddji preassadieđáhusas.

 

– Heajos dásseárvopolitihkka

Bealit leat šiehtadallan cuoŋománu 5. beaivvi rájes, eai ge leat boahtán ovttaoaivilii.

Sotnabeaivvi čuovganeapmái botkejedje šiehtadallamiid.

YS, Unio ja LO Stat leat ovttasráđiid bokten dáid, go oaivvildit ahte fálaldat ii lean doarvái buorre, earret eará ollislaš rámma juohkima oktavuođas.

– Olu stáhtabargit leat vásihan ahte bálká lea njiedjan maŋimus jagiid. Stáhta ii leat čájehan dáhtu buhtadit dán, mii lea váidalahtti, oaivvilda Egil André Aas.

– Ráđđehus háliida addit stuorát doaibmamuni ja fleksibilitehta stádalaš ásahusaide. Ii leat jierpmálaš ahte mii čohkkát Oslos ja detáljastivret Finnmárkku mánáidsuodjalusa bargiid dahje Bergena professoraid bálkáovdáneami. Danne lea dehálaš stáhtii ahte stuorra oassi rámmas galgá geavahuvvot báikkálaš juohkimii, dadjá Mæland.

Bealit eaige soabadan dássásaš bálkká dáfus.

– Stáhta láhčá dili nu ahte šaddá beanta veadjemeahttumin njulget erohusaid nissoniid ja dievdduid bálkká gaskkas. Dát ii leat buorre dásseárvopolitihkka, oaivvilda Aas.

 

Jotket šiehtadallama

Vaikke YS Stat, Unio ja LO Stat leat ge botken šiehtadallamiid, de šiehtadallá stáhta ain Akademikerne servviin.

– Mii leat duhtavaččat go ain šiehtadallat Akademikerne servviin bálkávuogádaga ođasmahttima ja lassi báikkálaš doaibmamuni dáfus. Seammás šállošat garrasit go eat nagodan soabadit daid earáiguin, lohká gielda- ja ođasmahttinministtar.
 

-Almmuhus-